Кенярдовтыця куля келень вечкицятнень туртов! Неть читнестэ Татаронь эйкакшонь книгань издательствась нолдась «500 валт / 500 вал / 500 слов» эрзянь, мокшонь ды рузонь неень шкань тонавтомапель.
Те мазый артовкс марто аволь покш валкс, кона алтазь эйдень кужос ды тонавтнема кудос якиця эйкакштнень, сынст тетяст-аваст ды тонавтыцяст туртов. Лия ёнов а молиця нолдавксось – васенце лездыця эрзянь, мокшонь ды рузонь кельтнень тонавтнемасо. Содамочинь кастомо лезды Шурале левксэсь. Сон эрси тонавтомапелень кой-кона лопатнесэ. Валтнэ пурназь курова. Эрьва валонть вакссо невтезь мазый артовкс.
Арсицятне-теицятне – Алсу Низамеева, Ольга Афанасьева, Фансия Сафина. Эрзянь кельс ютавтыцятне: Иван Рябов – Н. П. Огарёв лемсэ МГУ-нь филологиянь факультетэнь эрзянь ды мокшонь кельтнень кафедрань прявтось, Александр Данильчев – Саран ошонь 26-це лицеень эрзянь келень тонавтыцясь, «Мордовия» ГТРК-нь «Сияжар» раськень куронь важодицясь. Мокшонь кельс валтнэнь ютавтызь Валентина Гришунина – Н. П. Огарёв лемсэ МГУ-нь филологиянь факультетэнь эрзянь ды мокшонь кельтнень кафедрань доцентэсь, Оксана Трушкова – Саран ошонь 17-це тонавтнема кудонь мокшонь келень тонавтыцясь. Витницятне – Румия Юналеева, Азат Ганиев, Гюльнара Фазлиахметова, Инна Макарова, Гульнара Головина. Весемезэ лиссть 1000 нолдавкст. Книгась нолдазь Татарстан Республикань Прявтонть пингстэ татаронь келень ды Татарстан Республикасо эриця раськетнень келест ванстомань ды кастомань Комиссиянть кирдеманзо вельде.
Тиринь кельтнень кастомга Татарстан Республиканть марто кеме сюлмавоматне поладовить седе товгак.